Stay Connected:     Join our Facebook page   Follow us on Twitter   Subscribe to our YouTube channel
   
Saturday, 27th May 2017

خلطة_بيتا:الطالب عندنا بيتعلم..عليه؟#

Posted on 03. Mar, 2013 by in Columns

الكورة و الدين و السياسة!

بما ان الكورة مبقتش مجرد رياضة، واتهرست ف السياسة الف مرة قبل كدة، فأنا مستغربتش ان الدورى يرجع – وفى الوقت ده بالذات – عادى كدة، وإن فجأة الداخلية توافق على رجوعه رغم استماتتها قبل كده فى رفضه‘ قال يعنى احنا خلاص اكلنا وشربنا واشتغلنا واتجوزنا واقتصادنا رجع و (Batman) بقى وزير الداخلية ورجّع الامن!

لأ والكبيرة بقى ان الداخلية اصرَت على رجوعه برغم الاشتباكات وسقوط الشهداء كل يوم فى الاتحادية والتحرير وبورسعيد والسويس والمنصورة..

و – للأسف – لسَه هيموت ناس تانى كتير اوى، “علشان تبقى فاهم يعنى!”، زى ما بيقول شيخنا الجليل عبد الله بدر!

وبما اننا جبنا سيرة الدين، من حبة حلوين كدة بعد ماتش وادى دجلة وحرس الحدود كان فيه مراسل بيعمل لقاء مع لاعب (ملتحى) من فريق وادى دجلة، عادى وايه المشكلة؟

هو لحد كدة ماكنش فيه مشكلة، لحد ما اللاعب وسط الحوار قال للمراسل: “انا والله بلعب كورة على عينى، لان الكورة دى لهو وزى ما كلنا عارفين إن الملهيات حرام، يعنى الكورة حرام” !!

وبكدة الحمد لله خلطنا الكورة بالدين، ونقدر نضم الخلطة دى لكل الخلطات اللى فاتت زى خلط الدين بالسياسة والسياسة بالكورة والفلول بالثوار والشاى باللبن ……. وانا وانت!

كريم خزام ♥


الطالب عندنا بيتعلم.. عليه!

فى شوية (هلس) كدة بيبقوا السبب ف إن اى بنى ادم (كان عاقل) يدخل الGUC.. حاجات زى: ” الGUC دول بتوع تعليم مش بتوع فلوس” مثلاً.

يعنى ال8000 جنيه الزيادة على دفعة (28-) متطلبوش كدة وخلاص، لا يابو لسان طويل‘ دول كانوا م الاخر تأسيس لبنية تحتيه وضعية علميه زي الفل.. ده التأسيس ملا الجامعة  يا راجل!

بس بصراحة احنا فعلا بتوع تعليم، الطالب ما بياخدش اى معلومات مالهاش لزمة خالص خالص.. دي حتي وعلى حسب كلام اونكل (اشرف منصور) في ال(Orientation)، الطالب عندنا بيتصرف عليه مليون جنيه لحد ما يتخرج، بقي بالذمة في حد يعوز أكتر من كدة يا كفرة! ناس ناكرة الجميل فعلا.

وبما ان الكلام عن التعليم ممكن يطوّل قوي.. فالمهم إن الجامعة عندنا بتطلع ابطال:

ابطال الرياضة بيبقوا غالبا من (Architecture)‘ يعنى لو شوفت طالب ماشى بيفلفص كدة و بيطّلع في الروح.. اعرف ان ده (Architecture)، لسه مخلص (Deutsch) فى ال B وبيجرى على ال (Industrial)، لأ وكمان كان مطلوب منه ال(Treb) ده فى ربع ساعة السيمستر اللى فات, وحوش فعلا ماشاء الله! ربنا يكون معاهم والله.

ابطال الجهاد والتدين بقى ودول منتشرين بقي في كل ال(Majors) – طبعا الكلام مش موجه ل(Applied Arts) خالص خالص خالص.

يعنى مافيش اكل ف الكامبس غير “عم سعد” تقريبا (يعني مافيش اكل ف الكامبس).. وده طبعا تدريب على الصوم والزهد اللى هما تقوية فظيعة موت للإيمان، الواحد بقى يمشى يشوف نور الهدى و الإيمان على وشوش الطلاب، ما عندناش إحنا (Tattoos) ولا (Piercing) ولا شغل “ال….. الانجاس” على رأى معلم ومربى الاجيال الشيخ وجدى غنيم!

ده غير بقى زرابيح ابطال كتير غيرهم، يعنى كفاية ان في (Pharmacy) بياخدوا كورس ازاى يعملوا.. إحم… لبوس و لا مؤاخذة!

مع إن طلاب (Engineering) مبقوش محتاجين الحاجات دي خلاص.. أصل كورسات ال (CS) بتاعت (Professor Slim) خلتهم يكتسبوا مناعة خلاص!

مش عاوزين ننسى بس ابطال ال(Formula 1) اللى نازلين تخميس ودريفتات ف الباركينج،  لأوالبطلات اللى بيجوا يجربوا يسوقوا (Manual) على عربيات صاحباتهم، و بيحطوا ال(Touch) بتاعهم على العربيات اللى راكنة ف امان الله.

وبما انى لو فضلت اكتب عن الانجازات والابطال اللى عندنا مش هنخلص، فالخلاصة يعنى إن احنا احسن جامعة في مصر..

أصل اللي بييجي الجامعة عندنا مش مجرد بيتعلم وبس.. ده اللى بييجى الجامعة عندنا بيتعلم (عليه) من كل حتة!


و زى ما انت شايف كدة الدنيا عندنا عسلية خالص.. انت فاكر يعنى هنقعد نفِر كل حاجة ف الجامعة والبلد؟ ياراجل كبر مخك!

إلا هو يعنى ايه “خلطة بيتا” اصلا؟

إبعت تعليقك علي العامود أحسن علي الهاشتاج ده : “#خلطة_بيتا” !


يمكنك إرسال إلينا مقال رأي مكون من 3-5 فقرات أو عامود عن طريق comment[at]gucinsider.com أو الرد على مقال مكتوب خلال نفس العنوان.

تنويه: الجريدة غير مسئولة عن دقة ما هو منشور في صفحات الرأي ومشاركات القراء، وهي لا تعبر بالضرورة عن الموقف الرسمي للجريدة.


Leave a Reply

You must be logged in to post a comment.

 
 

 

Email